Aap Ko Agent Ke Taur Par Kaam Karne Ki Ejaazat Di Gayi Hai. is Ka Matlab Sirf Yeh Hai Ke Aap Ke Zariye Jo Musafir (Zaa’ir) Hamare Paas Aayein Ge Aur Raqam Ada Karke Umrah Ke Liye Jaayein Ge, Un Ke Ewaz Aap Ko Mu’aawaza Diya Jaayega. Raqam Ke Len-Den Ya Aur Kisi Mu’aamale Mein Hum Ne Aap Ko Apna Wakeel Nahin Banaya Hai.
Koi Shakhs (Zaa’ir) Raqam Kahan Jama Kare, Yeh Faisla Usi Ko Karna Hai. Agar Woh Aap Ke Paas Raqam Jama Karta Hai Aur Woh Raqam Hum Tak Nahin Pahunchti Hai To Us Ke Zimmedaar Hum Nahin Honge. Hum Sirf Usi Raqam Ke Zimmedaar Honge Jo Hum Tak Pahunch Jaaye. Lihaza Agar Koi Shakhs Chaahe To Direct Hamare Account Mein Raqam Jama Kar Sakta Hai. is Soorat Mein Us Ki Raqam Ki Mukammal Zimmedaari Hamari Hogi.
Hum Ne Aap Ko Bagair Kisi Fees Ya Raqam Ke is Kaam Mein Shaamil Kiya Hai, Lihaza Aap Ki Taraf Se Hum Par Koi izaafi Paabandi Aayad Nahin Hogi. Hamara Maqsad Mil Kar Aashiqaan e Rasool Ki Khidmat Karna Aur is Muqaddas Safar Ko Har Zaa’ir Ke Liye Yaadgaar Banana Hai.
Package Ki Tafseelaat Aur Mu’aawaza:
Filhaal 1500 Saala Eid e Milad-un-Nabi ﷺ Ke Mauqe Par 2 Umrah Package Pesh Kiye Gaye Hain:
-
Package 1 (23 Din): Aam Qeemat 1,00,000 Rupay, Ri’aayati Qeemat 75,000 Rupay.
-
Package 2 (15 Din): Aam Qeemat 85,000 Rupay, Ri’aayati Qeemat 70,000 Rupay.
Aap Har Zaa’ir Ko Umrah Ki Qeemat Aur Ri’aayat Wahi Bataayein Ge Jis Ka Elaan Hamari Taraf Se Kiya Gaya Hai. Kisi Bhi Zaa’ir Se Ek Rupiya Bhi Ziyada Wasool Karne Ki Hargiz Ejaazat Nahin Hai.
Tamaam Maali Len-Den (Transactions) Direct My Sunni Ziyarat Tours Ke Account Ya Payment Ke Tareeqon Ke Zariye Hoga. Phir Bhi Agar Aap Apni Marzi Se Kisi Se Raqam Lete Hain To Us Ko Fauran Hamare Paas Jama Karana Aap Ki Zimmedaari Hogi.
Aap Jin Logon Ki Seat Book Karein Ge, Un Ke Naam Aur WhatsApp Number Hamare Paas Bhejna Laazmi Hoga. Hum Un Se is Baat Ki Tasdeeq Bhi Karein Ge Ke Aap Ne Un Se Hamari Bataayi Hui Qeemat Li Hai Ya Ziyada?
Dayanat’darana Tash’heer Aur Zaabta-e-Akhlaaq:
Aap Zaa’ireen Ko Package Ke Baare Mein Sirf Wahi Baat Bataein Ge Jo Hamari Advertise Aur Messages Mein Di Gayi Hain. Koi Bhi Jhooti Baat, Mubaalga Aaraayi, Ya Aisi Sahoolat Ka Wa’da Na Karein Jo Package Mein Shaamil Na Ho.
Zaa’ireen Ke Saath Hamesha Ehteraam, Sabr Aur Mohazzab Andaaz Apnayein.
Hotel Aur Flight Ki Sahi Ma’loomaat:
Aap Har Zaa’ir Ko Yeh Baatein Waazeh Taur Par Bataa Dein:
-
Makkah Sharif Hotel: Dono’n Packages Mein Makkah Sharif Mein Hotel Haram Sharif Se Taqreeban 2 Se 2.5 Km Ke Faasle Par Hoga, Jis Ke Saath Haram Tak Aane Jaane Ke Liye Free Shuttle Bus Service Har Waqt Dastiyaab Hogi.
-
Madinah Sharif Hotel: Madinah Sharif Mein Hotel Masjid-e-Nabawi Sharif Se Taqreeban 1 Km Ke Faasle Par Masjid-e-Bilal Ki Taraf Hoga, Jahan Se Paidal Masjid Tak Pahunchnay Mein Taqreeban 15 Minute Lagte Hain. Yeh Baat Khaas Taur Par Buzurgon Ya Aise Afraad Ko Zaroor Bataayein Jinhein Chalne Mein Dushwaari Ho, Taake Woh Ba-Khabar Hokar Faisla Kar Sakein.
-
Flight: 15 Din Waale Package Mein Aana Aur Jaana, Dono’n Direct Flight Se Hoga. Jabke 23 Din Waale Package Mein Jaate Waqt To Direct Flight Hogi, Lekin Waapsi Via (Via) Bhi Ho Sakti Hai. Yeh Farq Waazeh Taur Par Bataana Laazmi Hai.
Package Mein Shaamil Deegar Tafseelaat:
-
Dino’n Ki Ginti: Za’ireen Ko Yeh Samjha Dein Ke “15 Din” Ke Package Ka Matlab 14 Raaton Ka Qiyaam Ya’ni 9 Raat Makkah Sharif Mein Aur 5 Raat Madinah Sharif Mein Hai, Aur Baaqi Waqt Safar Mein Shumaar Hota Hai. Isi Tarah “23 Din” Ke Package Ka Matlab 22 Raaton Ka Qiyaam (16 Makkah Sharif + 6 Madinah Sharif) Hai.
-
Free Gift: Filhaal Hamare Package Mein Sirf 5 Litre Aab-e-Zam Zam Free Diya Jaayega. Ehraam, Travel Bag, Ya Koi Aur Cheez Nahin Di Jaayegi. Yeh Baat Waazeh Taur Par Bataayein.
Aqeeday Aur Shar’i Umoor Ki Ehtiyaat:
Aap Sirf Sunni Sahihul-Aqeedah Musalmano’n Ki Hi Seat Book Karein Ge. Kisi Bhi Deobandi, Wahabi, Rafizi, Ya Sulh-e-Kulli Ki Booking Hargiz Na Karein.
Kisi Bhi Khatoon Ki Seat Book Karte Waqt Yeh Zarur Dekhein Ke Un Ke Saath Un Ka Koi Shar’i Mehram Maslan Shohar, Waalid, Bhai Ya Beta Wagairah Hai Ya Nahin?
Visa, Ticket Aur Payment:
Har Zaa’ir Ko Yeh Baat Zaroor Bataayein Ke Hamare Yahan Visa Aam Taur Par Rawaangi Se 4 Din Pehle Bheja Jaata Hai Jabke Air Ticket Ek Din Pahle Ya Airport Par Hi Diya Jaata Hai. Visa Jaari Hone Ke Fauran Baad, Har Zaa’ir Ko Package Ki Baqiya Tamaam Raqam Mukammal Taur Par Jama Karwaana Laazmi Hota Hai. Hum Rawaangi Ke Din Ya Airport Par Cash Raqam Wasool Nahin Karte. Tamaam Payments Pehle Hi Clear Hona Chahiyein.
Booking Mansookhi (Cancellation) Ki Policy:
Zaa’ireen Ko Waazeh Taur Par Bataayein Ke Agar Koi Zaa’ir Booking Confirm Karne Aur Raqam Jama Karwaane Ke Baad Safar Cancel Karta Hai, To Raqam Ki Waapsi Company Ki Policy Ke Mutaabiq Hogi. Aam Taur Par Visa Fees Aur Air Ticket Ki Qeemat Ko Wapas Karna Mumkin Nahin Hota.
Mumbai Tak Aamad-o-Raft:
Hamara Flight Mumbai Se Rawaana Hoga Aur Waapsi Bhi Mumbai Mein Hi Hogi. Lihaza, Jo Zaa’ireen Door Daraaz Ke Shehron Se Aa Rahe Hain, Unhein Mashwarah Dein Ke Woh Pehle Apne Shaher Se Mumbai Tak Ke Liye Train Ya Flight Ke Ticket Ki Dastiyaabi (Availability) Ko Dekh Lein, Us Ke Baad Hi Umrah Ki Seat Book Karwaayein.
Zimmedaari Ki Hudood Aur Tanaza’aat Ka Hal:
Baraah-e-Karam Note Karein Ke Airline Ki Taraf Se Flight Mein Delay Ya Cancel Hona, Saudi Arab Mein Qawaneen Ki Tabdeeli, Ya Kisi Bhi Qudrati Aafat Jaisi Gair-Mutawaqqe Soorat-e-Haal Mein Company Ki Zimmedaari Mehdood Hogi, Taaham Hum Apne Zaa’ireen Ki Har Mumkin Madad Karein Ge.
Agar Agent Aur Company Ke Darmiyaan Koi ikhtilaaf Paida Hota Hai, To Use Baahmi Afhaam-o-Tafheem Se Hal Kiya Jaayega. Agar is Ke Ba-Wajood Hal Na Ho To Kisi Zimmedaar Mufti Se Rujoo Kiya Jaayega Jis Ke Liye Aap Ko Mumbai Bhi Aana Par Sakta Hai.
Uper Likhe Tamaam Usool O Zawaabit Ko Tasleem Karna My Sunni Ziyarat Tours Ke Sath Agent Ke Taur Par Kaam Karne Ke Liye Laazmi Hai Aur Hum Hasb e Zaroorat is Mein Tabdeeli Bhi Kar Sakte Hain.
Yaad Rahe Ke Aap Hamara Number Apne Phone Mein Zaroor Save Karein Warna Hamara Agla Message Aap Tak Nahin Pahunch Sakega.
788-76-786-12