Aap Ko My Sunni Ziyarat Tours, Mumbai Ki Promotional Team Ka Member Banaya Gaya Hai. Aap Ke Zariye Jo Musafir (Zaa’ir) Hamare Paas Aayein Ge Aur Raqam Ada Kar Ke Umrah Ke Liye Jaayein Ge, Us Ke Ewaz Aap Ko Ek Tay Shuda Mu’aawaza Diya Jaayega. Yaad Rahe, Hum Ne Aap Ko Maali Len Den Ke Liye Apna Wakeel Nahin Banaya Hai, Lihaza Raqam Ke Tamaam Mamlaat Ki Zimmedari Hamari Hogi.
Kaam Ka Tareeqa Aur Mu’aawaza:
Tash’heer: Aap Sirf Wahi Message Aur ishtehaar Share Karein Ge Jo Hamari Taraf Se Bheje Jaayein Ge. Us Mein Likhi Gayi Qeemat Ya Kisi Bhi Tafseel Ko Change Karne Ki Ejaazat Nahin Hogi.
Raabta: Jo Log Seat Book Karna Chahein, Aap Unhein Hamara Official Number 7057861956 Dein Taake Woh Barah e Raast Hum Se Raabta Kar Sakein. isi Ke Sath Aap Un Ka Naam Aur WhatsApp Number Hamein 7057861956 Par Fauran Message Kar Dein Taake Hum Use Aap Ke Reference Ke Taur Par Note Kar Lein.
Mu’aawaza: Jab Aap Ke Zariye Bheja Gaya Zaa’ir Apni Mukammal Raqam Ada Kar Dega, To Aap Ko 1 Mukammal Seat Par 500 Rupye Mu’aawaza Diya Jaaye Ga.
Diyanat Daraana Tash’heer Aur Zabta e Akhlaaq:
Sachchai: Aap Zaa’ireen Ko Package Ke Baare Mein Sirf Wahi Ma’loomaat Dein Jo Hamare ishtehaaraat Mein Likhi Ho. Koi Bhi Jhooti Baat, Mubaalgha Aaraayi, Ya Aisi Sahoolat Ka Zikr Na Karein Jo Package Mein Shaamil Na Ho.
Maali Len Den (Transactions): Tamam Maali Len Den Direct “My Sunni Ziyarat Tours” Ke Official Account Mein Hoga. Aap Ko Kisi Bhi Zaa’ir Se Cash Ya Personal Account Mein Raqam Lene Ki Ejazat Nahin Hai.
Aqeeda: Aap Sirf Sunni Sahihul Aqeeda Musalmano’n Ko Hi Hamare Paas Bhejein. Wahabi, Deobandi, Rafzi, Ya Sulhe Kulli Wagairah Se Hamara Contact Na Karayein.
Package Ki Ahem Tafseelaat:
Hotel (Makkah Sharif): Hotel Haram Sharif Se Taqreeban 2 Kilometre Ke Faasle Par Hogi Aur Wahan Se Haram Tak Aane Aur Jaane Ke Liye Free Bus Service Maujood Hogi.
Hotel (Madinah Sharif): Hotel Masjid e Nabawi Sharif Se Taqreeban 1 Kilometre (15 Minute Paidal) Fasle Par Masjid e Bilal Ki Taraf Hogi. Yeh Baat Khaas Taur Par Buzurgon Ya Chalne Mein Takleef Mehsoos Karne Waale Logo’n Ko Zaroor Bataayein.
Dino’n Ki Ginti: “15 Din” Ke Package Ka Matlab 14 Raaton Ka Qiyaam (9 Makkah + 5 Madinah Sharif) Hai. isi Tarah “20 Din” Ke Package Ka Matlab 19 Raaton Ka Qiyaam (13 Makkah + 6 Madinah Sharif) Hai. Baaqi Waqt Safar Mein Shumaar Hota Hai.
Za’ireen Ke Liye Aam Shartein (Aap Ki Ma’loomaat Ke Liye):
Visa Aur Ticket: Visa Aam Taur Par Rawaangi Se 4 Din Pehle Aur Air Ticket 1 Din Pehle Ya Airport Par Diya Jaata Hai. Visa Jaari Hone Ke Fauran Baad, Zaa’ir Ko Baqiya Tamam Raqam Jama Karwana Lazmi Hota Hai. Hum Airport Par Cash Wasool Nahin Karte.
Cancellation Policy: Booking Confirm Hone Ke Baad Safar Cancel Karne Ki Soorat Mein Raqam Ki Waapsi Company Ki Policy Ke Mutaabiq Hogi. Aam Taur Par Visa Fees Aur Air Ticket Ki Qeemat Na Qaabile Wapsi Hoti Hai.
Mumbai Tak Aana Jana: Hamara Flight Sirf Mumbai Se Hai. Door Daraaz Ke Zaa’ireen Ko Pehle Mumbai Tak Ke Apne Safar Ka intezaam Khud Yaqeeni Banana Hoga.
Zimmedari Ki Had: Airline Ki Taraf Se Flight Mein Delay/Cancelation Ya Saudi Arab Mein Qanoon Ki Tabdeeli Jaisi Ghair Mutawaqqe Soorat e Haal Mein Company Ki Zimmedari Limited Hogi, Lekin Hum Za’ireen Ki Har Mumkin Madad Karein Ge.
Tanaza’aat Ka Hal: Kisi Bhi Musafir Ke Saath ikhtilaaf Ki Soorat Mein, Use Aapsi Samjhaute Se Hal Kiya Jaayega. Hal Na Hone Ki Soorat Mein, Kisi Zimmedaar Mufti Se Contact Kiya Jaayega Jis Ke Liye Mumbai Aana Pad Sakta Hai.
Aakhri Baat:
Uper Likhe Tamaam Usool o Zawaabit Ko Man’na “My Sunni Ziyarat Tours” Ki Promotional Team Ke Har Member Ke Liye Laazmi Hai. Company Hasb e Zaroorat in Usoolo’n Mein Tarmeem Ka Haq Mehfooz Rakhti Hai.
Yaad Rahe Ke Aap Hamara Number Apne Phone Mein Zaroor Save Karein Warna Hamara Agla Message Aap Tak Nahin Pahunch Sakega.
788-76-786-12